For Artists

He Karanga

He karanga ki ngā Ringatoi, ki ngā Pou Whakaaro, ki ngā Toki Auaha o Aotearoa


MĀ TE RONGO, KA MĀRAMA

Otairongo FBImage:  Ōtairongo – Maree Sheehan at Artspace Aotearoa (Auckland Arts Festival 2020).
Experience this exhibition digitally here

Nau mai, haere mai! He pae Te Ahurei Toi o Tāmaki Makaurau e rewa ai ētahi huatau hao nui hei whetū pīataata. Ko tā te hui Ahurei nei he whakakotahi i a tātou, he whakanui i ō tātou reo me ō tātou whāinga, me te aha, he pae whakaata i tō tātou ao, i ōna tini hapori, i ōna tini tirohanga anō.

I ēnei rangi haurokuroku nei, e whai nei mātou ki te mahi tahi ki ngā ringatoi, ki ngā pou whakaaro, ki ngā toki auaha anō o Aotearoa, kia whakatinanahia ai ngā huatau whakahihiko o te wā: Nāku te rourou, nāu te rourou, ka ora ai te iwi.

E ai ki te ahunga toi kua tau i te Kahurangi Toi, i te Rakahinonga Auaha hoki, i a Shona McCullagh, e tonoa nei e mātou he kaupapa auaha, he huatau anō, ki ngā momo toi katoa, ahakoa kei hea e tau ana i te ara kunenga. E tonoa ana ēnei i ngā ringatoi, i ngā ringa hoahoa, i ngā pou whakaaro ngaio hoki o Aotearoa - tauhou mai, tautōhito mai anō. E whai nei mātou ki te tautoko pau te kaha atu i te whakarauoratanga mai o te rāngai toi rerehua o Aotearoa, ki tā tātou hui Ahurei e whakaritea nei mō te marama o Māehe 2021, he hui ka aronui atu ki te tautoko i ngā hua toi a ngāi Aotearoa.

E wātea ana ki ngā rau momo toi, ahakoa hoahoa, whakaari, puoro, kani, hanganga o roto, hanganga o waho, whakaari tiriti, toi ataata, toi matihiko, toi reo Māori, toi mā te tamariki, mā te hapori, mā te whānau. Maninirau mai, kapareta atu, ruri pakō mai, toi tiriti atu, whakaahua mai, whakaari puoro atu, toi waiata tira mai, whakairo atu, kōrero pou whakaaro mai, kaupapa ā-ipurangi atu... tae pū atu hoki ki tētahi momo he uaua nei te whakamārama, katoa, katoa ka taea! E pai ana kia tū ngā mahi nei ki hea noa, huri noa i Tāmaki Makaurau - ki rō ngahere, ki tātahi, ki runga papa rēhia, ki rō whare hapori, ki runga atamira matua, otirā, he pai hoki kia haria haeretia i te tāone nui. E ākina ana hoki he toi ka hua i te hapori kāinga, mā te hapori kāinga, he mea ārahi e ngāi ringatoi, e ngāi auaha ā-pāpori anō.

Mēnā he kaupapa toi tāu i aukatihia mō te tau 2020 nā runga i te COVID-19, mēnā he kaupapa tāu mō te tau 2021 kua rite nei hei whakatakoto māu, mēnā rānei he waewae kai kapua koe, he huatau tōu hei whanake māu mō te tau 2024, e pōhiritia nei koe. E ākina ana hoki e mātou kia ngātahi te karawhiu huri i ngā hapori hui ahurei o Aotearoa, nā reira tēnā whakapā mai, ahakoa nō hea rā koe i Aotearoa.

Tēnā, kia mārama mai, kua tīmata kē tā mātou wānanga me ētahi ringatoi, me ētahi kāhui anō mō te tau 2021, nā reira, mēnā ko koe tērā, kāore koe e mate ana ki te tono pēnei mai.

Ka timu te tai, ka pao te tōrea

Ka pēhea taku whai wāhi atu?
Tēnā tukuna mai tō huatau ki tēnei puka ā-ipurangi. E whakakīia ai e koe te puka, me mātua whai:

• Ngā taipitopito whakapā ki ngā ringatoi/kāhui e whai pānga ana
• Ngā tātai pūmanawa, ngā haurongo anō/rānei mōu, mō ō hoa mahi matua hoki
• He kōrero e āta whakamārama nei i tō kaupapa (kia kaua e nui atu i te 800 kupu)
• He whakaahua, he tānga ataata e whakamahere nei i tō kaupapa (mēnā kei a koe)
• Me tohu hoki te tau e whai nei koe kia tū ai tō kaupapa ki te hui Ahurei

Mēnā he māmā ake ki a koe kia kōrero ā-waha kē mō tō kaupapa, he pai anō kia tukuna mai e koe he kiriata e 3 meneti te roa e whakamārama nei i tō kaupapa.

Hei āhea kapi ai ngā tono?
Hei te Mane, hei te 1 o Hune 2020, hei te 9 karaka i te ata.

Ka ahatia ā muri atu i tērā?
Ngā kaupapa mō te tau 2021: Ka aro tuatahi atu a Shona me te kapa hui Ahurei ki te whakaaro i ngā kaupapa mō te tau 2021. Ka whakapā tētahi nō te hui Ahurei ki a koe hei te Paraire 26 o Hune, hei mua atu rānei, ki te kōrero tonu, mēnā e whai whakaaro ana mātou ki tō kaupapa mō te hui Ahurei o te tau 2021.

Te tau 2022, ā, hei tua atu anō: ka tīmata te kapa hui Ahurei ki te whakawhitiwhiti kōrero ki a koe mō te ara e taea ai pea tā tātou mahi tahi kia tū ai tō kaupapa hou. He tukanga herekore tēnei, engari ka rongo kōrero tuatahi koe i tētahi nō te kapa hui Ahurei hei te Paraire 31 o Hūrae, hei mua atu rānei.

Mēnā he pātai āu, ahakoa āhea, ka koa katoa mātou i tō whakapā mai! Mātua rā, tēnā whakapā atu ki te Tumuaki Hōtaka, ki a Steph Walker, ki [email protected], ki 022 066 9266 rānei.

He here, he taipitopito atu anō
• E pai ana kia nui ake i te kotahi ngā kaupapa ka tonoa mai e koe, e pai ana anō kia whai wāhi koe ki te kaupapa a tētahi atu, engari me wehewehe, ka tuku motuhake mai ai.
• Tēnā tukuna mai te whānuitanga o ngā taipitopito ka taea e koe ki te puka ā-ipurangi. Me mātua pēnei mēnā e whāia ana te whakatūnga o tō kaupapa hei te tau 2021.
• Kāore e kore e mōhio nei koe, ka pai katoa ki a mātou mēnā ka taea tā mātou tautoko i ngā kaupapa huhua noa atu i ērā e taea nei e mātou. Nā reira, tēnā, kia mārama mai koe, ehara i te mea ko tā mātou tīmata ki te whakawhiti kōrero ki a koe, ko tā te hui Ahurei āmine atu ki tō kaupapa, e kāo. He tohu kē tēnei e hiahia ana mātou ki te whai mōhiotanga atu anō ki a koe, otirā, ki tō kaupapa.
• E ū nei mātou ki te tautoko i a ngāi ringatoi nō Aotearoa, ahakoa ki hea noa atu i te ao e noho ana.
• He pai katoa ngā mahinga ngātahi ki ētahi ringatoi, ki ētahi kāhui rānei nō tāwāhi, he pai katoa hoki ko ngā kaupapa i tīmata mai i tāwāhi - heoi anō rā, me mātua ārahi e te hunga ringatoi nō Aotearoa, ka mutu, me whakaiti hoki te tapuwae waro ka hua ake.
• Kia tūmatanui ēnei whakawhitinga kōrero - mēnā kua tīmata kē tō kōrerorero ki hui ahurei kē atu, ki kaiwhakaatu kē atu, ki papa whakaatu kē atu rānei mō tō kaupapa, e hiahia nei mātou kia mātau ki tērā. E hiahia ana ngā hui ahurei ki te mahi ngātahi, ki te tautoko hoki i te whānuitanga o ngā mahi ka taea.
• E tonoa nei e te hui Ahurei ētahi kaupapa, he whānui nei ngā momo, ā, nō Te Ahurei Toi o Tāmaki Makaurau te mana whakatau ko ēhea ngā kaupapa ka kōwhiria e ia, ā, he aha te momo tautoko ka tukuna atu.

Click here for English version